Ne venigu problemojn antaŭe forigitajn de Dio
En Sia Sankta Evangelio laŭ Mateo, 12:43 ĝis 45, Jesuo transdonis al ni instruon pri spirita sekureco, kiu taŭgas ankaŭ por nacioj, kaj kiujn oni devas neniam forgesi, en tempo de granda interna perturbiĝo:
La strategio de satano
“43 Sed kiam la malpura spirito eliras el homo, ĝi trairas tra senakvaj lokoj, serĉante ripozon, sed ne trovas ĝin.
“44 Tiam ĝi diras: — Mi reiros al mia domo, el kie mi eliris. Kaj alveninte, ĝi trovas ĝin vakanta, balaita, kaj ornamita.”
Tiu animo — laŭ tio, kion mi skribis en la verko La Misio de la Sepdek kaj la “nevidebla lupo” (2018) — estas viro aŭ virino, elkarniĝintaj aŭ ne, en malbona spirita situacio.
“45 Tiam ĝi iras, kaj kunprenas al si sep aliajn spiritojn pli malbonajn ol ĝi mem, kaj ili eniras kaj loĝas tie; kaj la fina stato de tiu homo fariĝas pli malbona, ol la unua. Tiel estos ankaŭ al ĉi tiu malbona generacio.”
La Karitato de Dio forigas de sur nia vojo plej variajn problemojn spiritajn, psikajn, emociajn kaj materiajn. Krome, en la verko La Misio de la Sepdek kaj la “nevidebla lupo”, mi atentigas pri la fakto, ke la Dia Amiko, Jesuo, forigas de milionoj kaj milionoj tra la mondo la obsedantan spiriton, kiu siavice sin montras penta, tamen temas pri falsa pento. Vidu tion, kio okazis en la versiklo 45, “Tiam ĝi iras, kaj kunprenas al si sep aliajn spiritojn pli malbonajn ol ĝi mem (...)”.
Tio okazas pro la malatento ĉirkaŭ unu el la fundamentaj konceptoj de la Nevidebla Mondo: Leĝo de Allogo. La agordiĝo kun iaj tipoj de estuloj nur povas malbonfari al ni. Tamen, se ĝi estiĝos kun la Plejaltaj en la Spirita Mondo, tiam ĝi pligrandigos nian koron kaj Animon, kio rekte influas la spiritan, moralan, socian, financan kaj korpan sanon de nacioj.
En sia saĝeco, la popolo instruas al ni: “Senokupa cerbo estas laborejo de la diablo”.
Kaj la “nevidebla lupo”, obsedanta spirito, kiu ne havas karnan veston, iras tra la mondo en relativa libereco, se oni konsideras, ke li alproksimiĝas al iu homo nur kiam stariĝas kun tiu persono ia agordiĝo de sentoj kaj agoj, kiam li trovas breĉojn, tio estas, li instaliĝas en malplena domo, kiun antaŭe la Ĉiela Miraklofaranto purigis. Pro tio, estas esence grave reeduki, sub la lumo de Supera Spiritualeco, niajn psikajn kanalojn, kaj konservi ilin sanaj kaj neŝtopitaj, per la plialtigo de niaj pensoj, de niaj paroloj kaj de niaj agoj (la Triobla Harmonio kun Jesuo), turnitaj al Bonfarado, al Grandanimeco, al Ekumena Frateco, al Diaj Vero kaj Justeco; fine, al la Krista Amo, resumita en la Nova Ordono de la Kondukanto de niaj vivoj — “Vi amu unu alian, kiel Mi vin amis. Nur per tio ĉiuj homoj scios, ke vi estas miaj disĉiploj” (Evangelio laŭ Johano, 13:34 kaj 35).
Tiel ni firmigos konstantan psikospiritan ligon kun plej altaj sentoj, kun niaj Gardanĝeloj, Spiritaj Gvidantoj, Protektantaj Genioj, Benataj Animoj, Lumaj Spiritoj, kiuj povas ŝirmi nin kontraŭ tiu maliculo, kaj ni plu agados en laboro por Bono. Temas pri tre alta instruo pri Spirita Civitaneco, kiun la Ŝtatestra Kristo proponas al ni.
Ni neniam forgesu, ke koncernas nin ne revenigi problemojn, kiujn Dio forigis de sur nia vojo.
La komentoj ne reprezentas la opinion de ĉi tiu retejo; ili estas sub ekskluziva respondeco de ties aŭtoroj. Ne estas permesata la enmeto de netaŭga materialo, kiu malrespektas la etikon kaj bonmorojn kaj/aŭ la rajtojn de aliuloj. Konu plie ĉe Oftaj demandoj.