Agantoj por nia estonteco, aŭ por ĝusta kompreno pri la Profetaĵo

Estas urĝe montri, ke Profetaĵo, kaj nun mi aludas al la bibliaj antaŭdiroj, ne estas nepre sinonimo de skurĝado, sed la elmontro de rilatoj de kaŭzo kaj rezulto. Ĝi estas la sumo de tio, kion ni antaŭe faris, bona aŭ malbona. Estas necese, ke ni lernu tion por fari ĝin elemento por konscia progreso, tiel ke ni transformu nin, plenscie, en agantojn por nia estonteco, sur la Tero kaj en la Ĉielo.

Vivian R. Ferreira

Divulgação

Ne vana estas la komento de la franca verkisto Joseph Joubert (1754-1824): “Kiam de unu nia misfaro rezultas malfeliĉo, tiam ni plendas pri la destino”.

Kaj atentu, ke ni tion faras rilate la Apokalipson, kvazaŭ ĝi kulpus pri ĉiuj tiuj tragikaj aferoj tie trovataj. Ne! La vipoj en ĝi ekzistantaj vundas nur tiujn, kiuj malrespektas la Dian Leĝon. Temas pri simpla proceso de kaŭzo kaj efiko.

Pro tio, mi atentigas ĉiujn pri esence grava aspekto de la profeta deveno: la Dia Triunuo akompanas nian konduton, kaj prenas el ĝi antaŭe la konkludojn, kiuj rezultas de niaj bonaj aŭ malbonaj agoj.

Du plus du faras kvar, en plej simpla aritmetiko. Same, Lumaj Spiritoj, observante la Ĉielan Matematikon, antaŭvidas la rezultojn de nia semado sur la mondo. Tion oni nomas Profetaĵo.

Vi scias, ke se vi metos manon en fajron, vi brulvundos ĝin. Se vi falos en akvon, eble vi mortdronos, se vi ne scipovas naĝi, aŭ eĉ se vi scipovas.

Krome, Apokalipso havas siajn spiritajn, moralajn konsekvencojn; do, konsekvencojn sociajn, homajn, politikajn, filozofiajn, sciencajn, ekonomiajn, sportajn, artajn kaj religiajn, pli ol iam ajn. Mi ĉiam diras, ke en la sfero de Religio ĉio komenciĝas, ĉar ĝi koncernas la senton de homoj, eĉ se ateistoj. Tio ŝajnas paradokso, sed ne. Bonvolu pensi pri tio.

Arquivo BV

Alziro Zarur (1914-1979) asertadis, ke “en la religia kampo troviĝas solvoj por ĉiaj homaj kaj sociaj problemoj”.

La lasta Libro en la Sankta Biblio estas letero por atentigo fare de Amiko — tiuokaze, Dio —, sendita al ni per la Kristo kaj la Sankta Spirito, skribita per Frata Amo al Liaj kreitoj.

Prilumi la vojojn en nia vivo

En mia verko Jesuo, la Dia Profeto, mi demandis, ĉu eventuale estas la paperfolioj, sur kiujn oni presas la bibliajn profetaĵojn, la kaŭzantoj de tiuj katastrofoj (kiujn ni trudas al nia mondo), aŭ nia agema stulteco kaj avidemo senlima? Tio estas simple la Leĝo de Kaŭzo kaj Rezulto, kiu plene funkcias! Ne la Apokalipso uzis la atomepokon kun la intenco mortigi tutajn loĝantarojn.

En tiu sama verko, mi asertis, ke la Apokalipso ne estis farita por teruri per obskuraj vojoj de mistero, sed por prilumi la vojojn en nia vivo, ĉar Apokalipso signifas Revelacion. Kaj ĉar ĝi estas Revelacio, ĝi montras al ni tion, kio estis kaŝita. Kaj se ni malkovras tion, kio estis kovrita, tiam ni perdas la timon pri io ajn. Nekono estas patro kaj patrino de nescio, kaj ĉi tiu naskas timon.